СӨЗДЕН ІСКЕ КӨШЕТІН КЕЗЕҢ

ҚА Президенті Қасым-Жомарт Тоқаевтың “Жасанды интеллект дәуіріндегі Қазақстан: өзекті мәселелер және оны түбегейлі цифрлық өзгерістер арқылы шешу” атты Қазақстан халқына жолдаған Жолдауында көтерілген өзекті мәселелердің бірі-
Әлеуметтік-кәсіпкерлік корпорациялар жұмысы жайлы болды. “Әлеуметтік-кәсіпкерлік корпорациялар аймақтардың экономикалық өсімін арттыратын қозғаушы күш болуға тиіс. Бірақ көбі коммуналдық мүліктерді басқарумен және аса маңызды емес жобаларды жүзеге асырумен шектеліп отыр. Олардың аймақ экономикасына әсері шамалы”-дегені тегін емес.
Ауылдың әлеуетін көтеру мақсатында мемлекеттік бағдарламалар қабылдануда. Ниет дұрыс, бағыт-бекем. Бірақ, бұлар әдемі басталғанмен, аяғы ұраншылдыққа айналып кетеді. Соның салдарынан құжаты мен жобасы дұрыс болып, тиісті қаражатын алғанның бәрі бірдей өз ісін өрге жүргізе алмайды немесе түрлі сылтаумен сиырқұйымшақтатып кетеді.
Ал, өз мақсатына жету үшін бар күшін жұмсағандар өз өнімін өткізу жолында кедергіге тап болады. Ауылда балама көп болғандықтан, өткізу қиын немесе арзанға сатуы тиіс. Бұл шығынды ақтамайды. Міне, осындай кезде қолтықтан демер ӘКК-і тыс қалады.Егер, оларда ауылдан әкелінген өнімді қонымды бағаға сатып алса, мемлекеттік бағдарламамен жұмыс жасаушылар қатары арта түсер еді. Өйткені, тауары тоқтаусыз қабылданғасын одан әрі қызығушылық пайда болады. Бірақ, корпорация денінде сырттан бақылаушы деңгейінде қалады.
Сондықтан, мемлекет басшысы айтқандай, қажеті аз шаруамен айналысушы мекеме орнына ауылмен тікелей жұмыс жүргізіп, азық-түлік қауіпсіздігін қамтамасыз ете алатын ұйым құрылғаны жөн.

Аудандық қоғамдық кеңес хатшысы, ауданның құрметті азаматы Г.Аманкосова