Ақтөбеде Астана күніне орай экологиялық акция өтті
Ақтөбе облысының Табиғи ресурстар және табиғатты пайдалануды реттеу басқармасының бастамасымен «Таза Қазақстан» экологиялық акциясы аясында «Астана» саябағында абаттандыру және тазалау жұмыстары ұйымдастырылды.
Іс-шара Астана күніне орай өткізілді және оның негізгі мақсаты – туған өлкені таза ұстауға тұрғындарға үндеу, қоршаған ортаға деген жауапкершілікті арттыру, қоғамда экологиялық мәдениетті қалыптастыру.
Акцияға қала тұрғындары, белсенді жастар, облыстық және қалалық жастар ресурстық орталықтарының мамандары, сондай-ақ «Жасыл ел» жастар еңбек жасақтарының сарбаздары қатысты. Қатысушылар саябақ аумағын қоқыстан тазартып, көгалдандыру және абаттандыру жұмыстарын жүргізді.
Табиғатты қорғау – әр азаматтың парызы. Мұндай игі бастамалар экологиялық сананы қалыптастыруға және туған жерге деген сүйіспеншілікті арттыруға бағытталған.
Ақтөбе облысының Табиғи ресурстар және табиғатты пайдалануды реттеу басқармасы өңір тұрғындарын табиғатты аялауға, қоршаған ортаға қамқорлықпен қарауға шақырады.
